Blóðsveit skáta
Af www.skatar.is
Úti í löndum hófu skátar sérstaka starfsemi upp úr heimsstyrjöldinni 1914-1918 með því að gefa vissan hluta af blóð sínu til sjúklinga, sem höfðu orðið fyrir slysum eða miklum blæðingum vegna sjukdóma og þurftu því á blóði heilbrigða mann að halda. Hér á landi byrjaði slík starfsemi árið 1935. Voru það Roverskátar (RS) Væringjafélagsins í Reykjavík, sem hófu það starf.
Foringi Roverskáta var þá B.D.Bendtsen, en félagsforingi var Jón Oddgeir Jónsson. Höfðu þeir samvinnu um skipulagningu blóðgjafanna við prófessor Guðmundur Thoroddsen yfirlækni á Landspítalanum. Félagsforingi hafði árið áður flutt erindi á fundi Roverskáta um blóðgjafastarfsemi danskra skáta, sem voru meðal hinna fyrstu til þess að skipuleggja sérstakar blóðgjafsveitir sem sjúkrahús landsins gætu leitað til, hvenær sem þau þyrftu á blóð að halda fyrri sjúka og særða.
Blóðgjafastarfsemi skáta í Reykjavík jókst ár frá ári. Var rætt um það á fundi Roverskáta í ársbyrjun 1939 að stofna sérstaka sveit innan félagsins, sem allir skátar, eldri en 17 ára og án tillits til eþs, hvort þeir væru Roverskátar eða ekki, ættu kost á að ganga í og yrði hún nefnd ,,Blóðgjafasveit skáta í Reykjavík”. Skyldi vinna að því að sveitin yrði svo fjölmenn sem kostur væri á, ,,svo blóðgjafirnar dreifðust á sem flesta skáta”. Um vorið sama ár kom sveit þessi saman og fól þeim Jóni Oddgeiri Jónssyni og Þorsteini Bergmann að vinna að eflingu sveitarinnar og nánari skipulagningu.
Á fyrsta fundi blóðgjafasveitarinnar, sem haldinn var í janúar 1940, voru gerðar ýmsar breytingar á starfi sveitarinnar. Þá voru liðin fimm ár frá því að skátar hófu þessa starfsemi. Stjórn Blóðgjafasveitar skipuðu þá Leifur Guðmundsson ritari, Þorsteinn Bergmann gjaldkeri og Jón Oddgeir Jónsson formaður. Eftir þetta upphaf blóðgjafa skáta færðist þessi starfsemi inn í deild í tengslum við Landspítalann og Blóðbankinn var stofnaður 1953.
-Gunnar M. Magnússon tók saman 1981
Segja má að skátar hafi verið frumkvöðlar í blóðgjöf og átt þátt í stofnun Blóðbankans eins og sjá má í grein sem fer hér á eftir. Þeir sem síðan þarfnast blóðgjafanna eru sjúklingar sem fara í hjartaaðgerðir, þarfnast krabbameinsmeðferðar eða liðaskiptaaðgerða. Þá þarfnast nýfædd börn á vökudeild og mæður þeirra einnig blóðhluta. Skátar setjið blóðgjöf á góðgerðarlistann og gefið blóð! Á heimasíðu Blóðbankans má fá frekari upplýsingar um blóðgjöf.
Heimild: Bandalag íslenskra skáta. 2005. http://scoutdesign.lht.is/default.asp?ItemGroupID=7&NewsID=772. Reykjavík.
Loading ...