Skátafélagið Hraunbúar

Fundurinn í dag var tvískiptur. Sumir voru á fánaborgaræfingu en hinir voru að hanna tjalbúðarhlið og fleira skemmtilegt fyrir Landsmót í sumar. Viljum við enn og aftur benda ykkur á að síðasti séns til að skrá sig á Landsmót er 30. apríl. Því fyrr, því betra samt.

Núna um helgina ætlum við í rosalega spennandi hellaútilegu. Þið getið skoðað foreldrabréfið með því að smella á „Lesa alla frétt“.

Vegna fjölda áskorana eru hér nokkrar fréttir af dróttskátunum.

Í síðustu viku fórum við á skyndihjálparkynningu hjá Björgunarsveit Hafnarfjarðar. Þar fengu krakkarnir að spreyta sig á að nota mænuborð, setja á spelkur og binda almennilega um sár. Nokkrir af nýliðum björgó tóku á móti okkur og þökkum við þeim kærlega fyrir skemmtilega og fræðandi kynningu.

Í gær var heldur ekki slakari fundur. Castor fór að klifra hjá Björkunum. Krakkarnir fengu að klifra í stóra klifurveggnum og þeir sem höfðu áhuga gátu æft sig að tryggja. Stóðu krakkarnir sig með endemum vel, margir virkilega að reyna á sín mörk. Claus foringi lét það heldur ekki stoppa sig að vera fótbrotinn og klifraði líka með gipsið. Þökkum við klifurdeild Bjarkanna kærlega fyrir að taka á móti okkur líka.

Einnig viljum við minna ykkur á að við ætlum í útilegu 30. mars – 1. apríl. Ferðinni er heitið í skátaskála Hraunbúa, Hverahlíð. Við viljum að sjálfsögðu sjá sem allra flesta þar, svo takið helgina frá núna strax. Þeir sem eru að fermast þessa helgi þurfa samt ekki að örvænta, við ætlum aftur í aðra útilegu með vorinu.

Næsta miðvikudag ætlar fararstjórn Hraunbúa á Landsmót skáta að koma í heimsókn. Þau ætla að kynna mótið, svara spurningum ykkar og flytja með okkur Landsmótslag Hraunbúa, sem er þó ég segi sjálf frá, alveg frábærlega skemmtilegt lag.

Howdy Hraunbúar!

Loksins er skráning Hraunbúa á Landsmót skáta 2012 hafin!  Með því að smella á linkinn hér fyrir neðan komist þið inn á skráningarsíðu Hraunbúa. Mikilvægt er að vanda sig við skráningu og fylla allt saman vel og vandlega inn. Muna að skrá skátann sem: Participant.

Ekki er búið að ákveða lokafrest skráningar, en það er samt best að skrá sig sem fyrst, svo fararstjórn fái sem réttasta mynd af fjölda til að geta samið við rútufyrirtæki og ákvarðað sameiginlegan kostnað.

Aðrar landsmótsfréttir:

Önnur fjáröflun Hraunbúa er að fara af stað í þessari viku, og munu allir skátar fá með sér bréf heim um hana. Einnig munu upplýsingar verða sendar foreldrum í tölvupósti. Stefnan er tekin á tvær til þrjár fjáraflanir til viðbótar eftir áramót. Nú þegar eru nokkrir skátar næstum því búnir að safna fyrir öllu landsmótsgjaldinu, svo það er um að gera að vera duglegur í fjáröflununum!

Fyrir jól fá skátar og foreldrar þeirra sent upplýsingahefti um landsmót, þar sem fararstjórn segir frá öllu sem komið verður á hreint þá. Einnig verður foreldrafundur í lok janúar.

Ekki hika við að hafa samband ef einhverjar spurningar vakna!

Tengill á skráningu fyrir Hraunbúa:

Tengill á heimasíðu landsmóts:

http://www.skatar.is/landsmot2012/

Bestu kveðjur,

Fararstjórn Hraunbúa

Una Guðlaug, María Björg, Kolfinna og Birgir Snær

Tölvupóstur: landsmot@hraunbuar.is

Félagsútilega Hraunbúa um síðustu helgi gekk ótrúlega vel og hátt í hundrað Hraunbúar skemmtu sér konunglega í hinum íslenska Hogwarts skóla í Vindáshlíð. Myndir frá þessari stórfenglegu helgi eru komnar inn á facebook síðu Hraunbúa. Endilega skoðið þær, því þær eru vægast sagt ótrúlega skemmtilegar :)

Fönixreglan vill hér með þakka öllum kærlega fyrir helgina. Hún var frábær og þið eruð öll æði.

Takk fyrir okkur!

P.S. Minni á dagsferð drekaskáta 1.október, sjá frétt hér fyrir neðan.

Kæru Rauðskinnur, Riddarar og DS Castor. Vegna óviðráðanlegra og margþættra ástæðna fellur síðasti sumarfundurinn, sem átti að vera í kvöld, niður. Í staðinn er ykkur öllum boðið að mæta á opið hús í Hraunbyrgi fimmtudaginn 1.september kl.18-20 þar sem boðið verður upp á maaaaargt og mikið spennandi:D Hlökkum til að sjá ykkur fyrsta september! Og takk kærlega fyrir alveg yndislegt sumar, það er búið að vera ótrúlega gaman með ykkur í sumar.

Undirbúningur Félagsútilegu Hraunbúa haustið 2011 er farinn á fullt, en útilegan verður haldin í Hogwarts, skóla galdra og seiða (Vindáshlíð), helgina 23.-25.september 2011. Þemað að þessu sinni er HARRY POTTER, svo það er um að gera að grafa upp galdraskikkjurnar úr kjallaranum, dusta rykið af töfrasprotanum og fara að rifja upp galdrana. Veitt verða verðlaun fyrir flottustu búningana og margt annað.

Í hvaða heimavist setur flokkunarhatturinn þig?
Hvað verður í gangi í Hogsmeade?
Hver vinnur Þrígaldraleikana?
Kanntu Quidditch?
Hver finnur leyniklefann?
Verður ÞÚ svo heppinn að fá bréf frá Hogwarts skóla?

Hraunbúar, takið helgina frá!

Nánari upplýsingar berast þegar nær dregur, fylgist líka með á facebook síðu Hraunbúa.

Kveðja frá Fönixreglunni